10/27/2011

Güey n´Uviéu preséntase "El sistema débeme una chocolatina", últimu poemariu de Pablo X. Suárez.


Pablo X. Suárez presenta’l so últimu poemariu, El sistema débeme una chocolatina, esti xueves 27 d’ochobre, a les 20.30 hores, en La Caja Negra (C/ Xesús, 12), n’Uviéu. Ye la so segunda obra poética, cola que, en palabres de la so editorial, Suburbia, l’autor alcanza la madurez poética. El volume ta compuestu por poemes que traten asuntos tan cotidianos como les chapes de ciclistes de la infancia o les tardes de fútbol nos chigres.

Na presentación van participar, amás del autor, los poetes Rubén d’Areñes, Sofía Castañón, Sergio G. Camblor y Laura Marcos. Depués del actu, va haber una aftertimba con vinilos del Campillín Music Session.

Equí dexo un poema del llibru:

día de Champions

Los díes que´l barça xuega la Champions
los senegaleses que venden cedés entren nos chigres
y ente paisanos
de camisa de cuadros y pantalón de pinza
queden clisaos mirando pa la tele
con aire inexorablemente europeo.
Ye entós cuando se permiten un café na barra
gastando lo poco que ganaron esi día
olvidando en suelu la bolsa enllena entá
de la música tonta fabricada en serie
que tan forciaos a vender.
Dizque ye l´ünicu cachu d´Europa
que tienen permitío:
un migayu
d´internacionalidad fecha pa probes.
Y pue que´l barça
col que se sienten tan inocentemente idendificaos
pierda esi día
y esi cachu triste d´Europa refalfiada
que son quien pa papar,-yos sepa, pa encima
-de la que vuelven andando
pa los sos pisos fríos
y sobrepoblaos de les afueres-
amargu.
Pablo X. Suárez. "El sistema débeme una chocolatina"(Suburbia Ediciones)

No hay comentarios: